Gesprochenes Wort auf Züridüütsch mit vielen Rechtschreibefehlern…
Sehr geehrter Herr Präsident, liebe Patrick
Gschätzti Dame und Herr Regierigsrät, Dame und Herre Nationalrät, Kantonsrät, Behördemitglieder, Deligierti, Partimitglieder und Gäst
Also ich han ä narre Freud, dass Sie dä Wäg uf Hüntwange gfunde händ. Ich heisse Sie alli herzlich Willkomme!
Wä mer um d’Klimaerwärmig froh wär, isch sie nöd da.
Jetzt sind mir drum nur BIM Amphitheater statt IM Amphitheater. Ich möchti grad am Afang mim OK vo hüt Abig danke, wo hät müese i Wätter-Eventualplanige dänke, em langjährige SVP Vorstandsmitglied und Gmeindrat Peter Merkt, wo für mich als Vize-OK-Presi d’ Büez gmacht hät und guet drissg wiiteri Hälfer gfunde hät, Danke Peter, danke Helferinne und Helfer – äm Festwirt äm Patric Gross, äm Technick-Chef Markus Pfister und äm Verkehrs- und Sicherheits-OK-Mitglied Ernst Demuth.
Dänn Danke äm Musikverein Wil-Rafz unter äm Präsidium vo dä Dennis Buur (Baur) und äm Dirigänt, äm Paul Buur.
Buur – dämit simer bim Thema Landwirtschaft. In Hüntwange – es isch mini Ufgab, ihne mini Gmeind ä chli dörfe z’präsentiere – häm mir no ein hauptbruefliche Landwirt.
Aber bi üs gits vili näbebruefliche oder oder immer na tätige pensionierte Buure und Pächter – zum Bispiel hät die Dekoration vo dä Bühne dä pensionierti und immer na aktivi Armin Enderli gmacht, ä langjährigs SVP-Mitglied. Und mir händ vieli nebebrueflichi Rebbure – Dä Wii wo sii hüt drinket chunt vo zwo verschiedene Wiibau-Verein-Räbgmeinschafte.
Lueget Sie über die offeni schöni Ebeni vom Rafzerfeld so gsend sii viel Kulturland. Würdet Sie jetzt IM Amphitheater sitze und 700 Meter grad us luege – das sött um die Ziit na möglich si – so gsend direkt i d’EU.
Aber kei Angst:
Da bi üs usse lauft d’Politik eso, dass die Dütsche gern eus würdet biiträte und sicher nöd umgekehrt.
Mir sind äs fründnachbarschftlichs abgschreckts Bollwerk gege d’ EU-Bürokratie: Guet, sind er nöd däbi, säged vili vo eusne Dütsche Fründ und chömmed bi eus go schaffe.
Eusi Wirtschaft hät mit wertvolle Rohstoff z’tue – villicht gspüret Sies – Sie sitzed grad uf äm grösste Grundwasserstrom vom Kanton Züri, wo öppe 20 Meter unter Ihne flüsst.
…und mir planed au die gröscht Wasseruhr, falls dä Regierigsrat sini Drohig wahr macht und dä Wasserbedarf vo dä Masseiwanderig mit eus wot decke, in dem er ein Teil vom Rhi dahere versickere laat. Sie glaubets nöd, ab e so Projekt gits.
Sie sitzed im Moment au zmittst im gröschte Chieswärk vo dä Schwiiz. Vo Hüntwange isch än erste Drittel vo dä Flächi, 1.7 km2, Chiesabbaugebiet, än zweite Drittel isch Wald, wo dä Gmeind ghört, än dritte Drittel isch Sidligsgebiet und dä gross Rescht isch Kulturland.
En Reschte gits, well sich die Drittel überschnidet, mir händ Chiesabbaugebiet au mit Wald und Kulturland au im Chiesabbaugebiet.
Im Züri Oberland – liebi Gossauer Delegierti – wehred ihr Eu gäge dä Abbau und d’Deponie im Wald, mir da wäred froh, mir chönntid dämit äntli afange. Östlich dävo isch bereits grabe und stönd d’Werkgebäude vom Chieswärk, westlich dävo grabed s’Chieswärk hüt in Dütschland. Das Stuck Wald däzwüschet chönnted mir viel windgschützter-sturmresistenter, stabiler, dichter ha, wämer’s i dä nächste 30 Jahr 20 Meter würdi tüferlegge.
Das zeiget, wie ebe d’Regione und Gmeinde so verschiide sind im Kanton, dass D’SVP, wo seit, zerscht wird vor de eigene Hustür g’lueget, dänn im Bezirk, dänn im Kanton, dänn im Bund und dä Bürger und d’Bürgeri sind d’Cheffe uf allne Ebene – dass ebe d’SVP Zuekunft hät, solang mer d’Verschiedeheit vo dä Regione zuelat.
Anderi Region, anderi, apassti Lösige. Dass Gmeinde, D’Schwiiz, ja sogar Europa vielfältig bliibed, das isch eusi Ufgab i dä nöchste vier Jahr. Es isch ä Ehr, dass mir d’Nationalratsliste da däzue in Hüntwange verabschiedet.
Hüntwange hät 1’030 Iwohner – Wunderschöni Rigelbaute prägets Dorf, Vereinsläbe, Natur. Und mir sind stolze Teil vom Bezirk Bülach – Ich begrüesse Sie jetzt na als SVP-Bezirkspräsident:
Bi dä Gmeindratswahle 2018 häm mir vier Sitz i dä Exekutive däzue gunne. Mir händ 1’230 Mitglieder im Bezirk, än Wählerateil von 31%, was 13’500 Wähler entspricht, mir händ mit äm Glattal, äm Oberhuser-Riet, äm Flughafe, Rafz und Eglisau die dynamischte Wirtschafts-Wachstumsregion vo dä Schwiiz.
Es friedlichs und ustarierts zämeläbe vo chlinere Gmeinde, wie Hüntwangen, wo drümal meh Iwonner als Arbeitsplätz händ, und vo Städt, wie Klote oder Walliselle, wo drümal meh Arbeitsplätz als Iwohner händ.
Ich freu mich sehr, dass Sie und ds Büro vo dä Parteileitig trotz Gägesätz und Dymanik JA gseit händ zum Risiko DV bi eus abzahlte. Mögi das beflügelnd würke.
Ich mache na uf Eusi Würscht, Getränk und feine Chueche ufmerksam, Chaufet sie Bons uf Vorrat, — und übergibe jetzt sehr gern s’Wort äm Patrick für die ziilstrebig füerig vo däre gschichtsträchtige Versammlig, Danke vielmal!